Unseri Fasnachts-Figiirli

Unseri Fasnachts-Figiirli gits scho syt es d Vorstadt-Glunggi git.
All Joor kunnt e neys derzue, wo mir allne Mitgliider zueschigge.
Wenn me Gligg het, bikunnt me au ains an dr Fasnacht gschänggt...

 

Wie wirds aigedlig gmacht?

Das sind mir schon männgmoll gfroggt worde, wohär die Figiirli kemme.
Mache dien mir alles elai.
Vom Ussdrugge bis zem Versand an alli Mitgliider – mit vyyl Hilf vo ainige Bassive.

Bi dere glaine Fottireportage us em Joor 2008 ka me uns a bitz iiber d Schultere luege.

 

Erschti Dail – vor em Brenne

Zerscht emole macht me sich Gedangge iiber e neys Sujee wo zumene Figiirli basse wuurdi.
Denne macht me e «Broddoddypp». Wenn das esoo uussekoo isch, wie me sich das vorgstellt het, giesst me dervo zwai Negativforme (aini isch Resärve) us Gips.
Denne ka s bald loos goo und mir kemme zem

Usdrugge
Am 22. Sebtämber 2008 isch es eso wyt gsii. Mir hän uns alli in dr Wärggstatt droffe. E mänggs Kilo Doon het scho uff uns gwartet, schnäll verschafft zwärde.

 

Allererscht wird dr Doon in glyych grossi Portione uff Brätter gleggt. Au d Abständ sotte ebbe glyych sii (suscht gits Regglamatione!) 
E soone Portion wird denne genau under d Negativform blatziert. Jetze brässt me die Form uff dä Doon aabe. Derby bruucht s Graft aber ainewääg au e bitz Gfyyl. 
Wenn e ganzes Brätt fertig usdruggt isch, goots wytter zem Loche, wo mir denne e Schnuur kenne duurezie, wenn s Figiirli fertig gmoolt isch.  
Derno wird jedes ainzelne Figiirli sorgfältig vom Abfall befreyt und nochenander zem Droggne uff Lochbläch gleggt. Die letschti Kontrolle isch jetze. Speetschtens jetze ka me no reagiere. 
Lätzi Figiirli und (suubere) Doon-Abfall kunnt wiider zrugg an Aafang und wird zumene neye Bolle gformt, wo wiider usdruggt wird, usw.  

 

Alli Figiirli wo fertig usdruggt sind, mien jezte richtig usdroggne.
Denne goots in Oofe, wo si zem erschte Mol brennt wärde ...

 

Zwaiti Dail – nooch em erschte Brennvorgang

Jetze sind alli Figiirli-Rohling s erscht Mool brennt und staihart.
Au im Oofe kenne e baar no lätz uusekoo, bräche oder wäärde no krumm.

 

Jetzt isch no alles farbloos und matt.  
Bim Usdrugge gits e scharfi Kante, wenn me s nasse Figiirli mit em Droot vom Droot trennt. Und vom Drablipfe kass mänggmool e unscheeni Braue gää.  
Das isch nit wytterscht schlimm. Mir mien aber jeedes Figiirli ainzeln schlyffe... 
... schlyffe und nonemool schlyffe! 
Derno ka me ändligg mit em Moole afoo. E Baar mit em gääl...  
... e Baar mit em root... 
... und e Baar mit em schwarz. 

 

Wenn wiider e Laadig fertig isch, geen die gmoolte Figiirli nonemolle zem Brenne und Laggiere.

 

Letschti Dail – Stämbble + Bänddele

 

Jetze isch s neye Figiirli aigedlig fertig. Jetze fäält numme no weenig. Jedes ainzelne Figiirli wird uff dr Ruggsytte gstämbbled...  
... und mitere Schnuur duur s Loch bänddelled. Jetze ka me s (fascht iiberall) aahängge. Wo iiberall sait e Aggddyyve Glunggi nit.  
Fyyni Finger sind do vo groosem Vordail ...gäll Robi  
S isch immer e glatti Sach, wenn mir do zämmehogge. 

 

Jetze hämmer s gschafft. Iiber 1'200 Stigg händ s Brenne, Schlyffe und Moole iiberläbt und sind nit kaputt gange.
Jeedes Bassivmitgliid bikunnt ains per Poscht zuegschiggt.
E Dail bikunnt e jeede Aggddyyve fir an dr Fasnacht z verdaile.
Dr Räschte blybbt im Käller.
Bis zem neggschde Joor im Käller...